Rubiera y Cienfuegos

     Enxamás intercambié una palabra con Cienfuegos nin con Rubiera. El primeru d’ellos ye’l destituyíu director del Festival de Cine de Xixón, el segundu el conceyal que lu destituyó. Namás que conozo a los dos poles sos obres. Digo esto porque nesti país nuesu (Asturies), les critiques tómense como xabaces ataques resultáu de simpatíes o antipatíes personales. Nun ye’l casu porque nunca traté a nengún de los dos.

     De Cienfuegos y el so equipu sé que garraron un Festival de Cine que diba morriendo adulces, con casi nula incidencia nel panorama cultural xixonés y asturianu, y en poco más d’una década asitiáronlu como una referencia nel panorama cinéfilu estatal y européu. Sé qu’algamaron que de 10.000 espectadores pasare a 75.000. Y sé tamién que frente a otres iniciatives trataes como cortixos y envueltes en problemes, como la Semana Negra del inefable (y radical antiasturianista) Taibo, el FICX enxamás dio un problema nin a la clase política nin a la ciudadanía xixonesa, más bien al contrario.

     Sé tamién, qu’amás d’ufrir una serie de producciones cinematográfiques que, acertaes o non, intentaben dar una visión amplia y llibre de prexuicios del cine más independiente, el tratamientu al cine asturianu y mesmo a la llingua yera d’unos años a esta parte bastante dignu. Asina, el cine del país taba bien representáu en secciones como Esbilla Asturiana o’l Día d’Asturies (los nomes son tal cual, nun toi traduciendo). Dalgunes secciones más del festival teníen nomes nel nuesu idioma (Esbilla, Rellumes, Llendes), nel periódicu del FICX salíen testos n’asturianu, el catálogu del festival yera trilingüe (asturianu, castellán, inglés) y mesmamente’l so nome acortáu yera FICXixón. Ye evidente que siempre se puede facer más, pero paezme que tenía un tratamientu respetuosu cola cultura del llugar qu’abelluga al Festival.

     Pues bien, too esto nun foi abondo pa mantener al director y al so equipu, porque’l conceyal de cultura, Carlos Rubiera, entiende que’l festival necesita una renovación y un cambiu de rumbu. Ta nel so derechu de pensar asina, como yo lo toi de dicir que ye una decisión arbitraria, caciquil y mimética a les qu’hai poco practicaben el PSOE y el so aliáu IU, que tomaben la cultura de Xixón como’l so cortixu particular. La necesaria renovación tres 30 años de gobiernu de la FSA a la fin quedó nun “quítate tu pa poneme yo”. Lo cual, nun por esperao, ye menos criticable. Y si’l fondu de la mesma arreciende a sectarismu, les formes son propies de la España carpetovetónica.

     Lo que más me toca personalmente de too esto ye l’envolver esta decisión baxo la bandera asturiana. Ye enfrentar, como lo fai cierta “progresía cosmopaleta”, lo asturiano colo “moderno”. Y algunos agora yá tan aprovechando la coyuntura pa rearmase de munición dialéctica pa cargar nuevamente contra aquello qu’entienden que ye la cultura asturiana: una especie de folklorismu anacrónicu espresáu nun dialectu aldeanu. Allá ellos. Nun espero convencelos de nada. Soi de los que creen que puede escribise una reseña n’asturianu del cine alemán o dar un nome del país a un ciclu de cine francés, dalgo que, por cierto, facía’l FICX. Yo creolo, la xente del FICX creíalo. Esi sector progre “cosmopaletu” non, y yá nun sé si’l señor Rubiera creelo asina. 

    (Por cierto señores de PSOE, IU y allegaos: lo del FICX nun ye lo mesmo que’l Niemeyer o la Semana Negra, nun aprovechen la coyuntura pa defender dos proyectos de los que, siendo benevolente, lo menos que se puede dicir ye que tuvieron una xestión caciquil y cuentes públiques bastante privaes)

     Pa encima la decisión, en términos estrictamente políticos, ye d’una torpeza absoluta. Ye buscar un problema onde nun lo había. Ye asitiase nel centru de la polémica innecesariamente. Y quiéralo o non, ye xugar el to futuru políticu a dos cartes, el Festival Atlánticu y el FICX, que yá entamaron con mal pie. El primeru, pola evidente mengua nel presupuestu del proyectu estrella del señor Rubiera (un proyectu, que conste, que paezme mui bien); el segundu, por poner pates arriba l’eventu cultural que más consensu ciudadanu xeneraba na ciudá. Too por entender que tolo anterior nun valía, ensin detenese a pensar qu’evidentemente había coses que non y otres que sí. Facer tabula rasa del pasáu ye arriesgao, pero facelo amás guiándose de prexuicios y caleyando per llugares comunes ye suicida.

     De toes formes nun mos pongamos nerviosos. El señor Rubiera podrá cambiar el rumbu del FICX, aceptar ensin gorgutiar que’l PP-y quite dos tercios del presupuestu del Festival Atlánticu, pero siempre, siempre, va quedanos la Feria Taurina.